في حلف بعران العرب شفت العجب
تدهش لبيب الفكر يشعر باغتراب
وكل شي سموه واسمه بالقلب
عشنا وشفنا الامر يا دنيا عجاب
مقاومه قالو وهي تطلب طلب
للاجنبي يصلي بلدها بالخراب
والجيش قالو جيش صالح يا عرب
مخلوع قالو وهو وسط شعبه مهاب
والشعب قاوم ضد محلوق الشنب
قالو تمرد قام ضده بانقلاب
يشتو يجو باحلاف من كل العرب
وبلاك ووتر تدعمه وقت الطلاب
تحرير من من تبت ايديكم وتب
خاين ومسترزق على شعبي غراب
اهله على تربه ويحرب من حرب
ماهي مسلم حفن في ارضه تراب
هاتو المدرع والقذايف واللهب
وادو الطواير ذي تعلت في السحاب
قدام والله نذل منا من هرب
والا دعى مخلوق غير الله مجاب
يا مهلكه مهما جمعتي من حطب
باتدخلي في النار واحلامش سراب
ارض اليمن تاج العروبه من ذهب
وانتو فتحتو حربها من كل باب
الله يقطع بيننا وانتو السبب
الجار في حق الجوار اجرم وعاب