صباحك جنابك
معطر مزهر
مورق مشجر
و صابح معطر
صباحك جنابك
جنابك عارفني ؟!
جنابك شايفني ؟!
جنابك بتسمع زعيق الغلابه؟
انينهم و خوفهم و شكل الكآبه ؟
دموعهم و جوعهم بإيد الديابه ؟
اقولك جنابك ..
ديابتك كتير
غفيراو وزير
بينهش في لحم الرخيص الفقير
و يطلع منابر و يعلن نفير
هانبني و نعلا و يمكن نطير
هانزرع و نقلع و نخبز فطير
هانبدأ نعالج مريضنا الكبير
نربي عيالكم بحب و ضمير
ويلعب بحلم البسيط الأسير
يزغلل عينيهم بخيره الكتير
و تبدأ حكاية مواطن كسير
مصدق جنابه و شد الحزام
و صدق جنابك و شد اللجام
و بطل سؤاله منين او بكام
و اول ماشافك عظم سلام
و صحى العيال في عز المنام
هاناكل و نلبس و نصبح تمام
محمر مشمر فريك بالحمام
و مرت شهورهم بسرعه و أوام
و حبه ف حبه صاحبنا الهمام
يشوف الحقيقه يصدق تمام
بإنه الضحيه و كان الكلام
كلام في كلام في كلام في كلام
و زعق بصوته الجريح العليل
و قال .. اي حاجه لعابر سبيل
ياعالم غيتونا كتير او قليل
فظهرت ديابتك و قالت عميل
و خاين بيقبض و ناكر جميل
و يصرخ صاحبنا يا ناس مستحيل
ياناس مش عميل
ده انا اللي راضي بأقل القليل
و ساكت و قابل بجسمي النحيل
و ابني الهزيل
واخوه العويل
و بنتي اللي فاتها القطر الجميل
و اختي اللي شاخت بجوزها العليل
ياناس مستحيل
ياناس مش عميل
ياناس مش عميل
تصدق جنابك !
عارفك اصيل
و شايل همومها و حملك تقيل
و صاين و صابر و شايل جميل
مواصل في شغلك نهارك بليل
و شايل في عينك ترابها و نيل
و ناسها حبايبك و هم الدليل
عارفك اصيل
و شعبك اصيل
يصون الجميل
يحطك في عينه
يشيلك في قلبه و أذاك مستحيل
فحافظ عليهم و شوفهم بعينك
و شوف الديابه اللي بينهم و بينك
ها تكسر ايديهم هاتفرح سنينك
هاتنحل وبرهم ينور جبينك
هاتقطع دابرهم شعبك يعينك
شعبك و حبك
و هو اللي جابك
صباحك جنابك
ماهر ذكي
ربيع 2016